Молитва о восстановлении мира
Владыко Многомилостиве Господи, Иисусе Христе, Боже наш, молитвами Всепречистыя Владычицы нашея Богородицы и Приснодевы Марии, святых равноапостольных великого князя Владимира и великия княгини Ольги, святых Новомучеников и исповедников, преподобных и богоносных отец наших Антония и Феодосия, Киево-Печерских чудотворцев, Сергия, игумена Радонежского, Иова Почаевского, Серафима Саровского и всех святых земли Белорусския, благоприятну сотвори молитву нашу о Церкви и о всех людех Твоих.
От единыя купели Крещения, еже при святем князе Владимире, мы, чада Твои, благодать восприяхом, молим Тя, Владыко, дух братолюбия и мира в сердцах наших навеки утверди!
Благодатию Твоею власть предержащих ко всякому благу настави, воинов в заповедях Твоих утверди, лишенныя крова в домы введи, голодныя напитай, недугующая и страждущая укрепи и исцели, в смятении и печали сущим надежду благую и утешение подаждь, на брани убиенным прощение грехов и блаженное упокоение сотвори.
Исполни нас яже в Тя веры, надежды и любве, яко да во всех странах наших единеми усты и единем сердцем исповемыся Тебе, Господу и Спасителю нашему Иисусу Христу, со Безначальным Твоим Отцем, Пресвятым Благим и Животворящим Твоим Духом во веки веков. Аминь.
